Пошкырт кундем Янаул район тӱвыра да каныме пєрт пелен 1991 ий гыч «Ош пеледыш» ансамбль (снимкыште) пашам ышта. Вуйлатыше – О.М.Николаева.
– Ансамбльыш 4-6-шо класслаште тунемше ӱдыр рвезе-влак ден кугыеҥ-шамыч коштыт. Чылаже – 20 наре участник. Мыланна поснак йоча-влакым ужаш куанле. Ме тӱвыра пӧртыштӧ да районышто эртаралтше чыла гаяк мероприятийышке да пайремышке ушнена. Мутлан, «Монга бай гармун байрамы» (Гармонь пайрем), «Сабантуй», «Кугече», «Семык», «Ӱярня», «Шорыкйол» пайрем-влак. Конкурслаштат мастарлыкнам ончыкташ тыршена. «Ший кандыра» регион-влак кокласе фестивальыште ятыр гана сеҥышыш лектынна. «Талантами сияет Янаульская земля» конкурсышто «Хореография» таҥасыште палемдалтынна. «Будущее народа – в руках молодёжи» проект радамыште самырык тукымлан поснак кугу тӱткышым ойырена. Куштымаш да мурымаш-влак гоч марий тўвыра дене палымым ыштыме деч посна, марий тӱрым тўрлаш туныктена. Ончыкыжым марий лукым почаш шонымаш уло. Тӱрлӧ тошто арвер гоч йоча-влак кугезе коча-коваштын илышыштым пален налын кертыт. А ача-ава-влаклан «Шочмо йылмым тунеммаш да йӱлам арален кодымаш проблеме» теме дене йыргешке ӱстелым эртараш шонена, – каласкала Ольга Максимовна.
