Самоизоляций годым пайдале пашам ышташ ятыр лийын. Теве Кужэҥер район Саламатнур ял гыч Дмитрий Смородинов (снимкыште) салтаклан пу гыч шарныктышым ыштен. Дима изинек сӱретлаш йӧратен, садлан 5-ше классышке Национальный президент школ-интернатыш тунемаш куснен. 9-ше класс деч вара, пум пӱчкедымаш дене мастарлыкым погаш шонен, рвезе йолташыже-влак дене Угарман кундемысе Богородск оласе художественный училищыш тунемаш пурен.
– Тений Кугу Ачамланде сарыште сеҥымылан 75 ий темын, садлан чонем изирак надырым пышташ йодын. Мыйын кок кочам: Ион Тимофеевич Сабанцев ден Иосиф Иванович Иванов – немыч-влак ваштареш кредалын. Коктынат сусыргеныт да мӧҥгӧ пєртылыныт. Иосиф Иванович топольым шынден коден. Пушеҥге электротул воштырлан чаракым ыштен да пила дене йыген йӧрыктеныт. Тополь арам ынже лий манын, скульптурым ышташ кучылтынам, – каласкала рвезе.
Диман мастерскойжо шочмо кудывече лийын. Эн ончыч пушеҥге йытырым кок ужашлан шелын, вара пушеҥгын шӱмжым кораҥден. «Пашам вуй гыч тӱҥалман ыле, а мыйын эн ончыч кид лектын. Пун кугу да неле улмыжлан кєра пашам ышташ йӧсырак лийын. Тудым вес могырыш савыраш икмыняр еҥ кӱлын. Тичмашнек ямде лиймекше гына, салтак «кынел шогалын». А ямде скульптурым фронтовик-влаклан пєлеклалтше обелиск воктеке наҥгаяш пеҥгыде капкылан, виян кандаш пӧръеҥ кӱлын», – шарналта уста рвезе.
Салтак-шарныктышын кугытшо – 2,5 метр. Тиде скульптур Саламатнур ялыште шочшо да Кугу Ачамланде сарыште кредалше, тыныс илышым кондышо салтак-влаклан пєлеклалтеш. Салтакын оҥыштыжо – «За отвагу» медаль. Пу гыч ыштыме скульптурым Дима той тӱсан чия дене чиялтен. Усталык шӱлышан рвезе шочмо Саламатнур ял калыклан да тиде ял гыч сарыш кайыше салтак-влак лӱмеш кугу пӧлекым ыштен.
Салтак «кынелын шогалын»
