Самырык этноблогер

Марий кундемын, марий калыкын историйже дене палдарыме шонымаш дене Звенигово районысо 2-шо номеран Красногорский школын 10-шо классшым тунем пытарыше Мария ЗВЕРЕВА Instagram соцкылыште блогым вӱдаш тӱҥалын. Тудо самырык еҥ-влакым шочмо кундемын историйжым шымлаш таратынеже.

Машан блогшо «Идалыкын этноблогерже» всероссийский конкурсын «Самырык этноблогер» таҥасыштыже сеҥышыш лектын.

– Марий калыкын ӱмыржӧ кужу лиеш але уке? Тиде йодыш мыйым  тургыжландара.  Чылажат – мемнан, самырык ӱдыр-рвезе-влакын, кидыште. Шке таҥаш йолташем-влакым ончем да умылем: шочмо калык верч йӱлышӧ еҥ шагал. ИКН дене республикысе олимпиадыште кок гана сеҥышыш лекмем нерген ойлем, марий калыкын эртыме корныжо нерген шинча йӱлен каласкалем.  Самырык еҥ-влак утларак пален налаш кумылаҥыт, – ойла Маша.

Ӱдырын пытартыш пашаже республикын кызытсе илышыжым шымлымаш да XXI курымын хронологий таблицыжым ямдылымаш дене кылдалтын. Ончыкыжым этнограф  лияш шона. Маша шочмо кундемым шымлаш кумылаҥдымылан туныктышо М.С.Виногоровалан таушта.