Кугу Ачамланде сар кажне ешыште шем кышажым коден. Ныл ий шуйнышо шучко жап ок мондалт. Мыняр шуко салтак мӧҥгеш шочмо мландыш пӧртылын огыл!
Мыят кочам нерген возынем. Мый тудым ик ганат ужын омыл, ачамын Геннадий Павлович Павловын каласкалымыж гыч веле палем.
Кочам Павел Николаевич Николаев 1899 ийыште Морко районысо Кугорнӱмбал Шале ялеш шочын. Ковам дене коктын куд йочам ончен куштеныт: Зоям, Аннам, Анатолийым, Геннадийым, Георгийым, Антонинам. Кочам Морко селаште Марий транслесыште тӱҥ бухгалтерлан пашам ыштен. Кугу капан, мотор, пеш грамотный, ушан айдеме лийын, тудым эре руш манын шоненыт, рушла пеш чаплын ойлен. Почеркше мотор лийын, йоҥылыш деч посна возен, сандене штабышке писарьлан налыныт. 1942 ийыште Ленинградым аралымыжлан «За отвагу» медаль дене палемдалтын. 1944 ийыште Ленинград ола воктене увер деч посна йомын.
Ковам Акулина Андреевна лудын моштен огыл гынат, йочаже-влакым туныктен луктын. Шкежат пеш шуко йомакым пален да каласкален моштен, газет деке шӱмаҥден шоген, ушан-шотан лийышт манын шуко тыршен. Кочамын фронт гыч колтымо серышыже-влакым ешге лудыныт. Ик серышыштыже кочам тыге возен: «Неле гынат, йоча-влакым туныкташак тырше». Зоя ӱдыржӧ ачажлан серышым возен колтен, а кочам йошкар карандаш дене чыла йоҥылышыжым тӧрлен, серышыжым мӧҥгеш пыштен колтен. «Зоя, книгам шуко луд», – манын кӱштен возен.
Кызыт ме тыныс илышыште илена, Кугу Ачамланде сар нерген кино да книгала гыч веле палена. Садлан, йоча-влак, ветеран-влакын шарнымашыштым возен кодыза!
Р.Г.АНТРОПОВА, туныктышо.
Советский, Ӧрша.
