Тӱр – аралтыш да моторлык

Кугезе коча-кована-влакын марий тувырыштым ончалаш гын, могай гына тӱрым от уж. Кажныже мом-гынат ончыктен да аралыше виян лийын. Тачысе кечынат кидмастар-влак ургымо вургемыштым марий тӱр дене сӧрастарат. Лудшем-влак, тендам уста мурызо, кидмастар Надежда АКИЕВА дене палымым ыштынем.
– Надежда, эн ондак палыме шуэш: кидпаша деке кузе шӱмаҥында?
– Изиэм годым тӱрлӧ йоча журналым налынна. Тушто кид дене ышташ туныктымо мастер-класс-влак лийыныт. Мый кажныжым ышташ тыршенам. Чывигым, пушкыдо модышым, ургымем шарнем. Кумшо классыште тунеммем годым крючок дене пидаш туныктышо кружокыш ушненам. Тушто салфетке, мотор сумка-влакым пидынам. Шке пидме сумкам дене кевытышкат, модашат коштынам.
– Марий тӱр  кунам кумылдам савырен?
– Марий тӱр дене Республикысе усталык рӱдерыште пашам ыштымем годым палыме лийынам. Тушто декоративно-прикладной усталык пӧлка уло. Тунам Евгения Николаевна Трегубова марий тӱр дене специалист ыле. Шкеже руш. Самырыкше годым Йошкар-Оласе «Труженица» фабрикыш логалын. Тудо мыйым марий тӱрым тӱрлаш туныктен. Эн ондак салфеткым тӱрленам. Вара тиде пашам кужу жаплан монденам. Евгения Николаевналан мыланем марий тӱр тӱням почмыжлан кугу таум ойлем. Икмыняр ий эртымеке, мый сценыш лекташ тӱҥалынам. Сценылан келшыше вургем кӱлын. Вургемым ургышо ӱдыр дене шуко костюмым ургенна. У модель-влакым шонен муаш да тидым илышыш шыҥдараш мыланем моткоч келша ыле.
– Кызыт йочалан тендан ургымо ятыр марий тувырым ужаш лиеш. Тыгай вургемым ургымо годым мом шотыш налыда?
– Йочалан ургымо тувыр поснак мотор да йоча фасонан лийшаш. Эше ургымо материалым шотыш налман. Натуральный куэмым кучылтман. Йочан капкылже кугыеҥын деч ойыртемалтеш. Мый ожнысо вургемым ом уэмде – тачысе илышлан келшыше марий стилизованный вургемым шонен луктам. Вургемышке ойыртемалтше деталь-влакым пурташ йӧратем. Эше палемдыме шуэш: тӱр моторлык веле огыл – аралтыш.
– Тӱрым тӱрлымє деч посна иктаж-могай арвер-влакым ыштеда?
– Тӱрлє кундемышке концерт дене коштмо годым сӧрастарыше арвер-влакым ышташ тӱҥалынам. Тунам эше моткоч тыглай лийыныт, мастарлык, кӱлеш информаций ситен огытыл. Чыла шке шоненам. Жап эртымеке, тӱрлӧ шонымаш вуйышко пураш тӱҥалын. Кызыт кеч-могай сӧрастарыше ӱзгарым куштылгын ыштен кертам: шӱйшер, кидшоло, алга, пота да молат. Тылеч посна паспорт але вес документлан, ежедневниклан комыжым сєрастарем. Йоча кроваткыш, машинаш сакалташ аралтышым, брошко-влакым ыштем. Но кызыт шукырак жапым вургемлан ойырем. Вургемым ургымо мастарлыкем кугемдынем. Кодшо ийын Йошкар-Оласе сервис технологий техникумышто тидлан тунем лектынам.

Х.АЛЕКСАНДРОВА мутланен.