Марьяна Нигматзянова ден Игнат Дмитриев иктаҥаш улыт. Нуно 2-шо классыштет унемыт: Марьяна – «Канде кайык» гуманитарный гимназийыште, Игнат – Йошкар-Оласе 1-ше номеран школышто. Теле каникул годым авашт дене пырля тора Карелийышке миен коштыныт.
Родо-тукым калыкын мландыштыже, Онежское ер воктене йоча-влакым йомакысе Вееристия вуверкува, Lumi Kelloja лӱман эрге, Йӱштӧк Кугыза да Лумӱдыр вашлийыныт. Нуно карел модыш дене модыктеныт, куштыктеныт. Хаски паркыште пий-влакым лӱмын кучат. Марьяна кажныжым вуйышт гыч ниялтен. Карелий мландыште ожно саам-влак иленыт, саам чумышто шаман тулото воктен тӱрлӧ йӱлам эртарен, шудо чайым йӱктен.
Вес кечын Марьяна ден Игнат мастер-классыште кантеле дене шокташ тунемыныт. Тиде карел калык семӱзгар кӱсле гай ныжыл семым луктеш. Кантелем карел эпосын тӱҥ геройжо Вяйнямёйненын кӱслеже маныт. Тыгак мастар повар дене пырля рупиттетю (калитки) карел когыльым кӱэштыныт.
Марий Элын эргыже ден ӱдыржӧ карел кундемысе пӱртӱс поянлык денат палыме лийыныт. Российысе ик эн тошто «Кивач» заповедникыште лийыныт, тыгаяк лӱман вӱдшуҥгалтышым онченыт, дендрарийыше да пӱртӱс тоштерыште янлык да кушкыл тӱня дене палыме лийыныт. Рускеал курык паркыште мрамор карьер-влакым онченыт. Тидек ундемысе мрамор дене шке жапыштыже Санкт-Петербургышто полат-влакым сӧрастареныт. Кызыт курык паркышке турист-влак ончаш да каналташ толыт.
Карелий кундемын Петрозаводск рӱдолаже нергенат экскурсовод ятыр каласкален. Ынде йоча-влак сайын палат, тиде ола Петр 1 кугыжан кӱштымыж почеш чоҥалтын.
Марьяна ден Игнат Карелийыште кок кечат пелым веле эртареныт. Туге гынат кӱчык жапыште шуко ум пален налыныт. Марьяна Карелий нерген шарнаш йӱдвелысе морошка емыж гай брошкым налын, Игнат Рускеала гыч мрамор кӱм конден.
Л.Г.ИВАНОВА, туныктышо.
