Тукымым аралыше Ший Пампалче

М.Шкетан лӱмеш Марий национальный драме театр 18 да 19 декабрьыште калык ончыко «Ший Пампалче» музыкальный спектакльым луктеш. У постановко ончышо-влакым мо дене куандара? Тиде да моло йодышлан вашмутым спектакльын режиссёржо Р.Ю.АЛЕКСЕЕВ пуа.
– Роман Юрьевич, «Ший пӱян Ший Пампалче» марий калык йомакым сценыш лукташ мо таратен?
– Тиде йомак шукылан палыме. Ик тукым веле огыл тудым лудын кушкын. Спектакльыште тӱҥ сюжет йомакысе гаяк. Но спектакль мемнан, марий-влак, нерген, манам мый. Кушко ме илен шуынна? Кызытсе саманыште марий улмынам арален кертына мо? Марий калыкын йӱлажым, фольклоржым ончыкылык тукымлан переген кодена мо? Нине йодышлан вашмут-влакым кычалман. Спектакльыште кок вийын вашпижмашыжым ужына. Айдемын кӧргӧ вий-куатан улмыжым ме Пампалче гоч эскерена. Пампалче гай еҥ-влак мемнан коклаште шукырак лийыт гын, ме шонымашкына шуына.
Тылеч ончыч «Юмынӱдыр» мюзиклым сценыш луктында, теве ынде – «Ший Пампалче». Нунын коклаште вашкыл уло мо?
– «Юмынӱдыр» – тиде кӱшыл тӱнясе илыш дене палдарыше мюзикл. Ты тӱнясе ӱдырамашын вийжым, марий калыкын аралтышыже улмыжым ужына. «Ший Пампалче» мландымбалсе илыш ойыртемым радамла. Пампалче мландымбалне ила. Тудо шке илышыже, пиалже верч кучедалеш, ший товарже дене сурт-печыжым осал деч арала. Туге гынат Пампалче шке утарышыжым лач каваште муэш. Порсын лӱҥгалтышым кудалташ каваште илыше акаже, Юмынӱдыр, деч йодеш. Пампалче гоч ме кава дене вашкылым ончыктена.
Йомакыште Ший Пампалче ший пӱйжӧ дене ойыртемалтеш. Спектаклыштат тыгайымак ужына?
– Уке, чылт йомакысе семын огыл. Музыкальный спектакльыште Пампалче ший вуян. Пеленже ший товарым нумалеш. Тудым аралтыш семын куча. Вургемже пеш мотор. Каласен кодыман, спектакльыште герой-влак моткоч сылне, тачысе илышлан келыштарыме марий сынан костюман лийыт.
Марий калык йомак негызеш шындыме спектакль мурылан, куштымашлан поян. Тудо йоча-влакланат, кугыеҥ-шамычланат оҥай лийшаш.
Л.ГРИГОРЬЕВА мутланен.