Тунемме да каныме вер

Школысо библиотеке книга тӱняш икымше ошкылым ышташ полша. Сылнымутым лудын, икшыве шонаш тунемеш, герой дене пырля ойгыра, куана. Тыге книга йочан йолташышкыже савырна. Кужэҥер район Токтайбеляк школысо книгагудышто  ӱдыр-рвезе-влакым библиотекарь Л.А.Актуганова кажне кечын вашлиеш.

– Мемнан тӱҥ сомылна – йоча-влакым лудаш, книга дене кылым кучаш кумылаҥдаш, – ойла Людмила Алексеевна. –  Ӱдыр-рвезе-влак книгагудышто тунемме программе  почеш произведенийлам веле огыл, шкаланышт келшыше уверым кычалаш тунемыт. Книгагудо – пырля каныме, тӱшка дене пашам ыштыме вер.

Л.А.Актуганован вуйлатымыж почеш йоча-влак серызе-влакын лӱмгечыштым палемдат. Произведенийлашт гыч ужашым, почеламутым сылнын лудыт.  Книгалан, мутерлан пӧлеклалтше урокым эртарат. Тӱрлӧ ончерым келыштарат. Ялысе книгагудо дене кылышт пеҥгыде.

– Тӱҥалтыш класслаште тунемше-влак книгагудыш тӱшкан коштыт. Нуно йомакым, изирак ойлымашым лудаш йӧратат. Газет ден журналым шергалыт. Кугурак ийготан-влак тунемме программе почеш книгам налыт. 8-ше классыште шинчымашым погышо ӱдыр-рвезе-влак марий сылнымутлан утларак шӱман улыт. Настя Кошпаева, Иван Са-ратов, Андрей Изергин, Полина Иванова, Ксюша Нигамедзянова книгам ӱшанле йолташыштлан шотлат. Нуно кажне кечын книгагудыш вашкат, – палдара библиотекарь.

Пытартыш ийлаште библиотеке у книга-влак дене шагалрак пойдаралтеш гынат, лудшо-шамыч огыт шагалем. Тидыже чылам куандара.

Школ библиотекыште 1653 книга аралалтеш. Тышке методике, справочник, учебник, сылнымутан литератур пурат.