«Уке» манаш тунемман

Редакцийышке Татьяна И. (Шернур посёлко) деч йодыш пурен:

– Эргым суртышто тӱрлӧ ӱчым ыштылеш: обоеш фломастер дене сӱретла, талиҥгам пудыртылеш… Но мый нигунам ом вурсо. «Тыге ышташ ок лий» манын ойлен ом керт. Кевытыште мом йодеш, чыла налын пуэм. «Уке» манын ом вашеште. Нине шомак-влакым ойлаш кузе тунемман?

Тиде йодышлан психолог, психологий шанче кандидат, доцент Т.Н.ГОЛОВАНОВА вашмутым пуа:

– •«Уке» шомакым икшывылан шуэнрак ойлыман. Йоча кажне вич минутышто «уке» манмым колеш гын, тудо ончыкыжым тиде мутым шотыш налмым чарна.

•Иктаж-могай пашам ышташ чарыме годым «уке» шомакым ныжылгын, но ўшанлын ойлыман. Молан тыге ышташ лийдыме нерген умылтарыман. Мутлан, «пырдыжеш фломастер дене сӱретлаш ок лий» манмым икшыве иканаште ушышкыжо пыштышаш.

•Иктаж-мом ышташ чареда гын, йочан кумылжо вола. Икшывым лыпландараш манын, ӧндалза. «Мый тыйым умылем, но вет тыге ышташ ок лий», – ойлыза. Тыге йоча эҥертыш улмыдам шижеш.

•Молан ышташ лийдымым йоча огеш умыло гын, уэш шке семынже ышташ тӱҥалеш. «Уке» манын ойлымо гына шагал. Амалжым кӱчыкын да раш умылтарыман: кумылжо волымо годым йоча кужу жап колышташ огеш йӧрате.

•Южгунам «уке», «ок лий» манме олмеш иктаж-мом весым темлыман. Мутлан, «нине талиҥга-влак дене модаш ок лий, пудыргат. Шкаф гыч пластмассе талиҥга-шамычым луктын мод» манын кертыда.

•Йочан иктаж-мом йодмыжлан «вес гана» манын вашештеда гын, икшыве вучаш тӱҥалеш. Сєрымыдам огыда шукто гын, тыланда ӱшанымым чарна.

•Йочан йодмыжлан ешыште тӱрлын вашештышаш огытыл. Садлан кугыеҥ-влаклан ончылгоч кутырен келшыман.