Кызыт кевытлаште могай гына модыш уке!? Пурен шогалатат, мом налшашетымат мондет. А икшыве пала: «Авай, слаймым налын пуэт?» – йодеш. Мо тыгай слайм? Тидын нерген Йошкар-Оласе «Ух Ты!» модмо рӱдерыште тыршыше Анна Cергеевна СИДОРОВА дене кутырышна.
– Слаймым «ушан» пластилин маныт. Тудо лизун модыш гаяк. Шуйнылшо модыш мокоч оҥай. Мыняр шонет, тунар шарла – огеш кӱрл. Кӱшкыла нӧлталат гын, парняла кокла гыч «йоген» кая. Слайм яклака, пушкыдо. Мутлан, термослаймым (вес семынже тудым хамелеон маныт) изиш ырыктет гын, тӱсшӧ вашталтеш. Космический слайм йӱдым волгалтеш. Магнитный слаймыш тыгыде пуда, скрепке-влак пижыт.
– Те мастер классым эртареда, пайремыш, шочмо кечыш ӱжмӧпочеш коштыда. Слайм йочалан эҥгекым огеш ыште?
– Слаймым ышташ клей кучылталтеш гынат, эҥгекым огеш кондо. Тудо мелкий моторикым вияҥда, кидым лывырта. Слаймым ыштен, икшыве-шамыч шке гыч тӱрлӧ модышым келыштараш тунемыт.
– Мӧҥгыштӧслаймым кузе ышташ лийме нерген интернетыште ятыр видео уло. Ала иктаж рецептше дене палдареда?
– Интернетысе роликыште чыла секретым огыт ойло. Могай клейым кучылтшашым, кунар да кунам мом пыштышашым сайын палыман. Ме йоча-влак дене ош тӱсан «Момент» столяр клейым кучылтына. Тушко тетраборат натрийым изин-изин чӱчыктена. Мотор тӱсым пурташ гуашым ешарена да 15-20 минут сайын лугена. Шукыж годым парашют семын шарлышым, але юж шар гайым ыштена.
– Шке гыч ыштыме слаймым кузе да кунар аралаш лиеш?
– Слайм шуко аралалтше манын петыртышан атыште шинчыктыман. Лавырташ огеш лий. Шокшо кечыште слайм кидыш пижедылаш тӱҥалеш гын, ик-кок чӱчалтыш тетраборат натрий полша. Пеҥгыдемын але кӱрышталтеш гын, глицериным, йоча кремым ешараш лиеш. Тунам модыш уэш шуйнылшо лиеш.
