Шочмо сурт – тиде шкешотан историй. Тоштер сынан пӧрт республикыштына шуко. Мутлан, Н.С.Мухинын пӧрт-тоштерже, И.С.Ключников-Палантайын, Я.П.Майоров-Шкетанын да молынат. Нунын гаяк талантан лийын филологий шанче кандидат, уста литературовед Аркадий Васинкин. Тудынат суртшо аралалт кодын. Ты пӧртым Марий Турек район Арбор школышто 8-ше классыште тунемше Росина Васинкинан фотоштыжо ужынам. Ӱдыр «Люблю тебя, край утренней зари» районысо конкурсышко ушнен да «Мой двор, моя улица» таҥасыште сеҥышыш лектын. Палаш оҥай, Росина молан лач ты суртым фотош войзен? Ала родо лийыт? Ӱдыр тыге вашештыш:
– Кызыт Аркадий Васинкинын суртыштыжо Демьяновмыт илат. Вера Борисовна Демьянова авамын кумшо тукым акаже лиеш. А Аркадий Афанасьевич – тудын тукым чÿчÿжӧ. Икманаш, тора родо. Аркадий Васинкинын суртшым шкешотан памятниклан шотлем, садлан войзенам.
Ты пӧрт Курыкӱмбал ялыште Люсинер уремыште 26-шо номер дене верланен. Шанчыеҥын ала тушто книгаже, арверже, шерге фотожо-влак аралалтыт? Ты йодышлан вашмутым муаш манын, Йошкар-Оласе Калык арвер да сымыктыш тоштерын кугурак шанче пашаеҥже Л.В.Демьянова дене кылым ыштышым.
– Аркадий Васинкин – Борис кочамын тукым изаже. Кочам нунын пӧртыштым иктаж 1983 ийыште налын. Шанчыеҥ нерген кочам деч жапыштыже йодыштын омыл. Авам чӱчӱж деч 19 ийлан изирак, садлан пешыже ок шарне. Суртышто шуко вашталтыме. Чаманен каласаш логалеш, нимогай арверже кодын огыл, – ойла Любовь Витальевна.
Аркадий Васинкин В.М.Васильев лӱмеш Йылмым, литературым да историйым шымлыше марий институтышто, Марий кугыжаныш университетыште ятыр ий пашам ыштен. Юл кундемысе калык-влакын литературыштышт Кугу Ачамланде сар нерген романым, В.Колумбын усталыкшым шымлен. Ятыр шанче статьям серен. Марий литературым вияҥдымашке кугу надырым пыштен.
Христина АЛЕКСАНДРОВА
