Ковам Надежда Иштугановна Юмина – тылын труженикше. Кӧлегеш ялеш 1932 ий 10 октябрьыште шочын. Ешыште вич икшыве лийын. Келшен иленыт, изинек пашаче кумылан кушкыныт. Ача-аваже «Коммунар» колхозышто пашам ыштеныт. Коваем 1939 ийыште икымше классыш тунемаш каен, ныл классым тунем пытарен. Сар жапыште латик ияшыже годым шорык кӱтӱм кӱтен. Шошо ага годым имне дене мландым тырмален. Ялыште пашаче кид ситен огыл. Кочкашат коншудо кинде але кылме пареҥге веле логалын. Кугурак лиймекыже, колхозышто ушкалым кид дене лӱшташ тӱҥалын. Кумло ий дояркылан пашам ыштен, тыгак имньым, сӧснам, презым ончышат лийын.
1997 ийыште сулен налме канышыш лекмекат, тӱрлӧ сомылым шуктен. «Курмызак олык» калык ансамбльын тале участницыже лийын. Тӱрлаш, пидаш, ургаш йӧратен. Кажне пайремлан у марий тувырым урген. Кызытат кертмыж семын сурт сомылкам ышта, шорыкым ашна. Мый тудлан пеҥгыде тазалыкым, кужу ӱмырым тыланем.

Аида ЮМИНА.
Татарстан, Агрыз, Кӧлегеш.
Фотом еш архив гыч налме.