Школ шинчымаш тӱняшке уэш омсажым почеш. Йоча-влак парт коклашке шинчыт. Тыгодым икте эше канынеже, весе моткоч тунемнеже. Икшывым школ пагытлан кузе ямдылаш? Тиде да моло йодыш-влакым психолог Л.В.Каяткина (снимкыште) дене рашемденна.
— Любовь Вячеславовна, ача-ава-влак икшывыштым школ пагытлан кунам да кузе ямдылышаш улыт?
— Тунемме пагытлан ончылгоч ямдылалташ тӱҥалман. Кеҥежым ӱдыр-рвезе-влак шукыж годым варарак малаш возыт, эрдене эр огыт кынел. Эн ончыч школ режим деке уэш пӧртылман. Но тыгай вашталтыш трук лийшаш огыл. Йоча дене пырля кевытыш миен толман, тетрадьым, ручкам да уроклан моло арверым, вургемым, рюкзакым наледаш полшыман. Тидын годым икшывын келшыше арверым ойырымыж годым торешланыман огыл. Тыге тудын чоныштыжо куан кумыл озаланаш тӱҥалеш, школышкат кайымыже шуэш.
— Кодшо тунемме ийыште тунеммыжым йоча ынже мондо манын, мом ыштыктыман?
— Эн ончыч йочан кузе тунеммыжым шотыш налман. Нелылык лийын огыл гын, тудлан пешыже ямдылалташат ок кӱл. Икымше чырыкыште кодшо ийысе тунемме материалым ушештарат. Тунеммаште варашрак кодеш гын, августышто ача-аван але репетиторын полышышт кӱлеш. Тунемше-влаклан кеҥежлан книгам лудаш пуат, произведений але книга нерген шонымашым возаш темлат. Тиде пашам ача-ава тергышаш.
Йочан школыш каяш ямде улмыжым теве кушеч палаш лиеш. Тудо школ нерген мутлана, йолташыже-влакым ужнеже, тунемаш кайынеже. Вес икшыве-шамыч дене мутланен, кылым муын кертеш, кугыеҥым колышт мошта, шкенжым сайын куча. Шке ийготшылан келшыше нелылыкым сеҥен, полышым йодын кертеш. Икымше классыш кайыше йоча нерген ойлаш гын, лудын да шотлен моштымыжо гына шагал. Икшыве еҥ-влак коклаште шкенжым кузе куча? Кугыеҥын ойжым колыштеш мо? Ик пашам мыняр жап ыштен кертеш? Уш-акылже, тӱткышыжӧ, шонымашыже могай улыт? Ача-авалан тидым шотыш налман.
Жанна ФЕДОРОВА мутланен.
фотом еш архив гыч налме.