Кажне еҥ шочмо верже дене кугешна. Ме Пӧтъялыште илена. Тудо Пӧтъял ял шотан илемын рӱдыжлан шотлалтеш. Ялыште школ, клуб, йочасад, медпункт, 3 кевыт да моло уло. Школышко тӱрлӧ ял гыч йоча-шамычым автобус дене шупшыктат.
Ме ялнам чот йӧратена. Садержым, курык аркажым ончен, чон куана. Коча-кована-влакын ойлымышт почеш, яллан тӱҥалтышым Керебеляк кундем гыч толшо марий ыштен. Эн кугу эргыжын лӱмжӧ, Пектык, дене ялым лӱмден. А вес кок эргыжын лўмыштым: Сурлук ден Тогзянлук – кок уремлан пуымо. Ял воктенак Пӧт эҥер йога. Тушко кум памаш ушна. Унала толза мемнан ялышке!
Давид ПЕТУХОВ, Егор ИВАНОВ, Максим ЕГОРОВ.
Волжский район.
