Пӱртӱсым шымлаш кумылан-влак шонымашыштым тӱрлӧ семын шуктат. Икте фотографийым ышта, весе кушкыл-влакым шында, эскераш тунемеш, кумшо коллекцийым келыштара. Йошкар-Оласе 27-ше номеран школышто 9-ше классыште тунемше Софья Пирогова (снимкыште) кайык пыстыл-влакым пога.
Ныл ий ончыч соцкылыште Ксения Орёл-Пушкарёва дене палыме лиймеке, ты оҥай хобби деке шӱмаҥын. Ксения – республикыште ик эн опытан коллекционер да Российысе кайыкым аралыме ушемын координаторжо. Тудо Софьям погымо пашалан туныктен, кажне татше нерген каласкален, тыгак бёрдвотчинг нерген умылтарен.
– Пыстылым мландымбалне чӱчкыдын муаш лиеш. Тудым зип-пакетыш пыштем, маркер дене жапым да кундемын лӱмжым возем. Вара справочник-влак полшымо дене пыстылын озажым пален налам. Эрыктыме деч ончыч пыстылым кылмыкташ кӱлеш. Вара шовын дене леве вӱдеш мушман. Кошкымекше, пыстылым шарыман. Копшаҥге-влак коллекцийым ынышт тӱкӧ манын, тудым герметичный пакетыште але контейнерыште аралыман, – палдара Софья.
Марий Эл Республикыште 250 наре кайык ила. Софья кажныжын пыстылжым муаш шона. Кызыт тудын коллекцийыштыже тыште да вес кундемлаште илыше кайык-влакын 199 пыстылышт уло. Тыгак ӱдыр вашлийме шулдыран йолташ-шамычын фотографийыштым войза, сӱретым сӱретла. Шукерте огыл Тимофей Евсеев лӱмеш Калыкле тоштерыште «Про перо» ончер эртаралтын. Тушто Софьян коллекцийже гыч ужашым ончаш лийын.
– Тиде мыйын икымше ончерем. Ончышо-влаклан оҥай лийже манын, пыстыл-влакым кагазеш пижыктыме, кайыкын лӱмжым возымо, фотографийжым келыштарыме. Кажне пашам мыланем шергакан, но купчывын пыстылжым мумеке, чот йывыртенам ыле. Тыгак фазанын пыстылже моткоч мотор. Пыстылым погышо-влак шукын улыт. Интернетыште ятыр тӱшкам эскераш лиеш. Тушто коллекцийым ончаш, икте-весе дене пыстылым вашталтылаш да ик шонымашан йолташ-влакым муаш йӧн уло, – ойла ӱдыр.
Катя СЕРГЕЕВА.
Авторын фотожо.
