Йоча-влакын марий сем почеш куштымыштым, мурымыштым, почеламутым сылнын лудмыштым але семӱзгар дене шоктымыштым ужмеке, чонлан сайынак чучеш. Тугеже марий йылмын, тӱвыран, сымыктышын ончыкылыкшо волгыдо лийшаш, манын шоналтет. Ты шотышто примерым ача-ава, туныктышо, кугурак иза-ака-влак ончыктышаш улыт. Теве Татарстан Республик Арск район Шурабаш школышто 7-ше классыште тунемше Адель Антиповын эн ӱшанле эҥертышыже да полышкалышыже ачаже, Валерий Фёдорович, ден аваже, Олеся Игоревна, улыт. Нуно эргыштым тӱмырым пералташ кумылаҥдат, мурсемлан шӱмаҥдат, кеч-куштат марий йылме дене вожылде мутланаш туныктат. Рвезын аваже школышто марий йылмым да литературым туныкта. Ялысе тӱвыра пӧртыштӧ «Шишор» калык фольклор ансамбльым вуйлата. Йоча-влаклан «Изэҥер» ансамбльым чумыреныт. Адель – ты коллективын чолга участникше. «Арск шӱдыр» районысо вокал конкурсышто икымше верым сеҥен налын.
– Мый мурымо, куштымо деч посна почеламутым сылнын лудаш йӧратем, – ойла чолга рвезе. – «Колумб лудмаш» регион-влак кокласе конкурс-фестивальыш ий еда ушнем, сеҥыше-шамыч радамышке лектам. Уста поэтын «Шочмо йылме» почеламутшо чонемлан лишыл. Ты сылнымут дене теният иктаҥашем-влак коклаште сеҥыше лийынам. Вес ийын конкурслан «Чодыра йомак» почеламутым ямдылаш шонем.
Адель почеламутым сурт кокласе сомылым ыштыме годым тунемеш. А ялыште кеҥежым паша эре лыҥ. Ача-ава ятыр вольыкым ашнат, поян пакчагӧргым ончен куштат. «Кидем шӱкшудым сомыла, а ушем дене почеламут корнылам лончылем. Тыге писынрак шарнен кодаш лиеш», – манеш Адель.
