А.С.Крупняков «ила»

Советский район Шнаран селасе книгагудо-тоштер уста серызе, драматург, журналист А.С.Крупняковын лӱмжым нумалеш. Ик тӧнежыште библиотеке ден музей верланеныт. Тидыже историйым, тӱвырам шымлаш да лудаш йӧратыше еҥ-влакым ик-вереш погаш кугу йӧным ышта. Книгагу-дым Е.П.Ягода-рова вуйлата.

– Елизавета Петровна, книгагудо-тоштерлан МАССР-ын калык  писательже Аркадий Крупняковын лӱмжым кунам пуымо?

– 1988 ий октябрьыште Шнаран яллан 400 ий теммылан пӧлеклалтше пайрем эртаралтын. Тушко книгагудат ушнен. Мероприятийышке Аркадий Степановичым ӱжмӧ. Тылеч вара библиотекын пашаже серызын лӱмжӧ дене чак кылдалтын. Тудын илыш корныжым, усталык пашажым шымлымаш мемнан ик эн тӱҥ сомылна лийын. 2004 ий 22 майыште «Селан тӱвыраже 2003-2005» целевой программе почеш библиотекым книгагудо-тоштерыш савырыме. Аркадий Крупняковын шонымашыже шукталтын:  шочмо селаштыже тоштер почылтын.

– Аркадий Крупняковлан пӧлеклалтше ятыр мероприятийым эртареда,  очыни.

– 2019 ийыште серызын 100 ияш лӱмгечыжлан пӧлеклалтше кугу акцийым эртаренна. Ялыште Аркадий         Степановичым шарныше-влак эше улыт. Нунын каласкалымыштым войзенна да «Аркадий Крупняков – Шнаран селаште» видеом ыштенна. Круп-няков кече, Крупняков лудмаш йоча ден кугыеҥ-влакым иквереш    чумырат.

– Пандемийлан кӧра паша радамда вашталтын мо?

– «ВКонтакте» соцкылысе тӱшкаштына кугу пашам шуктена. Серызе-влакын илыш корныштлан, сылнымут пашаштлан пӧлеклалтше презентацийым, видеослайдым ямдылена. Тӱрлӧ теме дене онлайн-марафоным эртарена. Йоча книга арня, Агния Бартон кечыже, Пушкин лудмаш – ӱдыр-рвезе-влакын ик эн йӧратыме мероприятийышт. Тений Науко да технологий идалыклан кугу верым ойырена. Йоча ден самырык-влакым, кугыеҥ-шамычымат лудаш шӱмаҥдаш тыршена. Акцийлашке ушнаш таратена.

– Шнаран книгагудышто кок ушем уло. Нунын дене палдарыза.

– 7-11 ияш йоча-влаклан «Родничок» ушем пашам ышта. Шӱм-чоным пойдарымылан кугу тӱткышым ойырена. Шнаран ялысе йӱлам шымлена.  Кугурак ийготан-влаклан «Висвис» ушем уло. Тушко марий да руш йӱлам жаплыше, сылнымутым йӧратыше-влак коштыт.