Меат пион гай улына. Йоча-шамычат, поснак подростко-влак, ситыдымашым кычалаш йӧратат. Молан? Тиде да моло йодыш-влакым психологий шанче кандидат, гештальт-терапевт Т.Н.Голованова (снимкыште) рашемдаш полша:
– Шуко еҥлан ситыдымашым кычалаш куштылгырак. Икте-весе дене таҥастарат. Тиде поснак соцкыллаште шижалтеш. Ситыдымашым кычалын, шкеннам еҥын шылтален каласымыж деч ончыч аралена. Еҥ деч пагалымашым вучена, тӱшкаште шкеннам мунена.
Подростко годым тӱжвал тӱслан кугу тӱткышым ойырат. Соцкыллаште вес еҥ-влакым ончен, «Мыят тыгай лийшаш ыле» манын шонат. Иктаҥаш йоча але ача-ава деч критике сынан шомакым колыт гын, тургыжланымаш, лӱдмаш вияҥыт. Школышто тӱшка деч темдымашым шижыт гын, шкеныштым эшеат лапкаҥдат. Южышт тӱшка деч йӧршын кораҥыт, кутырымым чарнат, шке «тӱняштышт» илат.
– Татьяна Николаевна, икшыве шкенжым сай могырым аклаш тунемже манын, ача-авалан мом ыштыман?
– Йочам пеледыш дене таҥастараш лиеш. Мланде кукшо але утыждене ночко гын, пеледыш кошка. Ешыштат гипер- але гипоопека озалана гын, икшыве шке вийжылан ӱшанен ок куш. Тидлан йочам туныктымо деч ончыч ача-авалан шкем, тыгак еҥымат аклаш тунемман.
Мутлан, йочасадыш коштшо икшыве удан сӱретлен гын, ме тудым шылтален але мокталтен каласена? «Тый могай оҥай сӱретым сӱретленат. Вара ме тудым альбомыш вераҥдена. Мом сӱретленат, каласкале» манаш утларак келшен толеш.
Ача-ава икшывыжын ситыдымашыжым кычалеш гын, тудо шке илышыжым лончылен, тыгаяк сеҥалтмаш, шылталымаш, критике деч лӱдеш. Тидын шотышто «Звёздочки на небе» фильмым ончен кертыда. Икшывылан тудым пагалымыдам, аклымыдам ончыкташ тыршыман, весе дене таҥастарыман огыл. Кеч-могай чолгалыкшылан, изи я кугу сеҥымашыжлан мокталтыман. Йӧсӧ тат годым икшыве пелен лийман, пайдале ойкаҥашым пуыман. Тыге тудо кечмом эркын шке сеҥаш, шкенжым аклаш тӱҥалеш.
Христина АЛЕКСАНДРОВА ямдылен.
