Марий серызе, журналист, туныктышо А.К.Айзенвортым кӧ огеш пале?! Тудо Советский район Шуарсолаш шочын. Газет, журнал редакцийлаште пашам ыштен, сылнымутан произведенийлам возен. Руш серызе-влакын пашалаштым марлаҥден. М.Шкетанын, С.Чавайнын, О.Шабдарын, Олык Ипайын икмыняр сылнымут пашаштым руш йылмыш кусарен. Шочмо кундемешыже сылнымут шӱлышым курымешлан шыҥдарен коден. Верысе школышто тунемше-шамыч кызытат заметкым, ойлымашым, почеламутым возаш кумылан улыт. Серызе-влакын почеламутыштым сылнын лудыт. София Малахаева, Настя Яранцева, Алина Александрова (снимкыште – туныктышышт дене пырля) поснак ойыртемалтыт. Нуным тӱҥалтыш класслам туныктышо Г.В.Васина шӱмаҥда.
– Школыштына Анатолий Айзенвор-тын корныжым умба-кыже шуяш тыршена. Шочмо йылмылан, сылнымутлан шӱмаҥдаш манын, тӱрлӧ мероприятийым эртарена. Районышто да республикыште эртаралтше конкурслашке ушнена, – ойла Галина Васильевна.
Ӱдыр-влак «Ямде лий» газет дене кылым кучат. Йоча газетын 90 ияш лӱмгечыжлан пӧлеклалтше шымлыме па-шамат возеныт. Советский район Солнечный школышто эртаралтше Фёдоров лудмашке ушненыт да кокымшо верым сеҥен налыныт.
– «Ямде лий» деч мотор газет тӱняштыжат уке. Тудым эре лудмо да лудмо, тушко серыме да серыме шуэш. Ончыкыжым шукырак возаш шонена, – ойлат ӱдыр-влак.
Х.АЛЕКСАНДРОВА.
