Школ ден книгагудо ака-шӱжар гай улыт. Нуно икте-весышт деч посна пашам ыштен огыт керт. Волжский район Карай школыштат тыгак. Ӱдыр-рвезе-влак школ библиотекышке кажне кечын куанен вашкат. Нуным библиотекарь В.В.ЕМЕЛЬЯНОВА вашлиеш.
– Йоча-влак школ программе почеш лудшаш книгам налыт. Сылнымутан произведенийла дек утларак кумылаҥдаш серызе-влакын юбилейыштлан пӧлеклалтше ончерым ямдылена. Нине книгала почеш класслаште вашмутланымашым эртарена, – ойла Валентина Валериановна.
Марий произведений-шамычлан марий йылме да литератур арняште поснак кугу тӱткышым ойырат. Тиде арня марий писатель-влаклан пӧлеклалтше мероприятий-шамычлан поян. В.В.Емельянова ӱдыр-рвезе-влаклан почеламутым сылнын лудмо конкурслан ямдылалташ полша.
– Ме марий почеламутым лудаш йӧратена, – рӱж каласышт йоча-влак.
