Ксюша ден Арина Фёдоровамыт Йошкар-Оласе 2-шо номеран школышто тунемыт. Чолга ака-шӱжар тӱрлӧ конкурсышто мастарлыкыштым ончыктат, изинек марий шӱлышан, пайрем йӱлам жаплыше кушкыт.
– Мый лудаш йӧратем, школышто ИКН урок келша. Марий калыкын эртыме корныж нерген шуко оҥайым пален налына. Туныктышына Татьяна Николаевна Гребнева марий вургем, кочкыш, пайрем-влак нерген палдара. Шинчымашем пойдараш манын, коча-кова, авай деч йодыштам, – ойла Ксюша.
Арина акаж деч примерым налеш. Марла лудаш, почеламутым тунемаш йӧрата, тӱрлӧ поделкым ышта да конкурслашке ушна.
