«Ямде лий» газетыш возен шогышо чолга ӱдыр-рвезе-влакым ме «юнкор» але «юный корреспондент» манына. А Башкортостан Республикыште савыкталтше «Акбузат» журналыш серышешамыч «юный шагитовец» семын палыме улыт. Ты лӱмым «Я – юный шагитовец» медиашколым тунем лекше йоча-влак нумалыт. Медиашколым журналын тӱҥ редакторжо Лариса Хашимовна Абдулина (снимкыште) вуйлата.
– Шочмо йылме деке йӧратымашым изинек вияҥдыман. Редакций пашаеҥ-влак школлашке да йочасадлашке сотемдарыше паша дене лектедена. Республикнан тӱрлӧ районжо гыч возен шогышо йоча-шамычым 2024 ийыште иквереш погенна. Ты пашам Башкортостан Республикын Главажын грант-шамыч фондшо полшымо дене шуктенна. Вич кече жапыште 4-14 ияш ӱдыррвезе-влакым видео ден фотографийым войзаш, башкир йылме дене текстым чын да раш сераш, соцкылыш пост-шамычым луктедаш туныктенна, журналым ямдылыме радам дене палдаренна. Медиашколын лектышыжым 44 лаштыкан «Я –юный шагитовец» сборникеш савыктыме, – ойла Лариса Хашимовна.
Азалия Фаздалова ден Зульхиза Юсупова медиашколын чолга тунемшыже улыт. Ӱдыр-влак кок тӱрлӧ районышто илат. Башкир тӱвыра дене палдараш ямде улыт! Фотом еш архив гыч налме.
Катя СЕРГЕЕВА
Фотом еш архив гыч налме.
