Удмурт-влак, тӱҥ шотышто, Удмурт Республикыште илат, тыгак – Татарстаныште, Башкортостаныште, Пермь, Свердловск, Виче кундемлаште. Марий Элыштат Марий Турек районышто шке верыштым муыныт. 2021 ийыште шотлымо почеш, кундемыштына 1348 удмурт ила. Марий Турек район Кугу Карлыган селаште йылме, йӱла кузе аралалтыт? Тиде йодышлан вашмутым муаш манын, верысе тӱвыра пӧрт вуйлатыше Н.Ю.Иванова (снимкыште шолаште) дене кылым ыштышым.
– Чаманен каласаш логалеш, удмурт калыкын чотшо иземеш. Школыш коштшо йоча-влакат шагалынже одо йылме дене кутырат. Еш ялыште ила, ачажат-аважат удмурт улыт гын, йылме эше аралалтеш. Школышто йылмым факультатив семын веле туныктат. Виян туныктышо Елена Львовна Кандакова урокым оҥайын эртара, одо серызе-влакым вашлиймашке ӱжеш. Карлыганыште удмурт йӱламат жаплена. Ик эн йӧратыме пайремлан «Акашка» (Кугече) шотлалтеш. Йоча-влак ял мучко муным поген коштыт, вашла пайрем дене саламлат. Ме тӱвыра пӧртыштӧ ий еда ты пай ремым эртарена. «Акашка» годым кугезына-шамычын ожно модмо модышышт дене модыктена. «Ӟардон» калык фольклор ансамбль дене ты пайрем йӱла дене палдарыше фольклорно-обрядовый композицийым ончыктена. Шукерте огыл ты паша дене «Кугезе вож» республикысе фольклор фестивальышке ушненна да Гран-прим сеҥен налынна.
Тыгак сценыште салтакыш ужатымашым, «Шорт миськон» (Мытьё мотков) йӱлам модын ончыктена, – ойла Наталья Юрьевна.
Йылмым, йӱлам арален кодымаште «Ӟардон» ансамбльын надырже, чынжымак, кугу. Кызыт 2-шо класс гычак ӱдыр-рвезе-влакым ансамбльыш налыт. Одо-влак дене пырля тыгак марий, руш, татар йоча-шамыч коштыт. Икте-весын йылмышт дене мурат, куштымашым шындат. Чылан келшен, икте-весым умылен илат.
Христина АЛЕКСАНДРОВА.
Фотом ансамбльын архивше гыч налме.
