Мыланем «Артек» тӱнямбал йоча рӱдерыш миен толаш пиал шыргыжалын. Тушко поезд дене кок кече кудалынна. Марий Эл гыч чылаже 22 йоча лийын. Мый «Речной» лагерьыш, икымше морской отрядыш логалынам. Тиде отрядыште мыланем пеш чот келшен. Икшыве-влак икоян, чолга да весела лийыныт. Шуко ум пален налынам, у йолташ-шамычым вашлийынам. Ме шлюпко дене теҥызыш лектынна. Но тиддеч ончыч шлюпкын чоҥалтмыже, тушто мо улмо, такелаж, семафор нерген зачётым сдатленна. Чыла тиде таҥасымаште кӱлеш лийын. Тылеч посна тӱрлӧ мероприятийыште шкенам тергенна. Пырля погынен муренна, куштенна, сценкым ончыктенна.
«Артекыште» пӱртӱс пеш мотор. Ме курык коклаште иленна, а воктенна – Аю-Даг курык. Тушто мемнам «артековец» радамыш пуртеныт. Тиде шижмашым мут дене каласашат неле. Симферополь да Севастопольыш экскурсий дене миенна, шинчымашнам келгемденна. «Артекыште» каныме жап сай да сылне шарнымашым коден.
Анастасия МИХАЙЛОВА.
Волжский, Кугу Корамас.
Снимкыште: Анастасия Михайлова ден Анастасия Данилова (Волжск).
