Икшывын койыш-шоктышыжо, пӱрымашыже лӱм деч шога, маныт. Тидлан Башкортостан Республик Краснокам район Арлан ял гыч Эрика Александрован ача-аваже моткоч ӱшанат. «Эрика» поро кумылан, элым вуйлатыше семын кусаралтеш. Ӱдырын тыгай койыш-шоктышыжо изинек палдырна.
Вич ияш Эрика верысе «Берёзка» йочасадыш коштеш. Чолга койышыж дене ойыртемалтеш. Йочасадыште да районышто эртаралтше конкурслаште мастарлыкшым ончыкта. Почеламутым сылнын лудаш поснак йӧрата. Сеҥымашыжат уло. Йомакым каласкалаш кумылан. Ик эн йӧратымыже «Мераҥын пӧртшӧ».
Эльфис Гараевын марий мурыжо-влакым чӱктет гын, Эрика чарныде кушта. «Артистлак кертеш», – ойлат ача-аваже.
