Пӱртӱслан эҥгекым ыштет гын, мӧҥгеш пӧртылеш, маныт. Мый тиде шонымаш дене тӱрыснек келшем. Шоналтыза, чодыра, олык огыт лий гын, могай юж дене шӱлаш тӱҥалына? Эҥерым, ерым, памашым арун огына кучо гын, яндар вӱдым кушто муына? Арулык нергенат эре шарныман. Пӱртӱсыштӧ каныме деч вара почешна ару вер кодшаш. Шокшо игечыште тул лӱдыкшыдымылык нергенат мондыман огыл. Тулотым кугыеҥ-влак деч посна ылыжташ ок лий.
Ача-авам пӱртӱсым аралаш, арулыкым эскераш изинек туныктат. Шӱкшакым ужмеке, мый поген налде ом чыте. Пырля тунемме йолташем-влакымат поро пашам ышташ кумылаҥдем. Ме пӱртӱсын санитарже лийшаш улына. Теат, йоча-влак, пӱртӱс поянлыкым чот эскерыза.
Костя ШЕХУРДИН.
Шернур, Купсола.
