9-15 сентябрьыште Санкт-Петербург олаште шнуй князь Александр Невскийын тӱнямбал спорт модмашыже эртаралтын. Тушко Белоруссий, Казахстан, Сербий, Индонезий, Египет, Гагаузий да Российын 75 регионжо гыч команде-влак ушненыт. Кужэҥер районысо «Баскетбол» ушемын самырык спортсменкыже-шамыч Елизавета Лоскутова, Ксения Мочалова, Ариана Романова, Алина Рослякова (снимкыште) Марий Элын командыштыже лийыныт да республикын чапшым араленыт. Ӱдыр-влак Кужэҥер посёлкысо 2-шо номеран школышто тунемыт.
– Таҥасымаш спортын тӱрлӧ видше дене эртаралтын: футбол, ӱстембал теннис, самбо, шахмат, баскетбол, тыгак ГТО нормативым шукташ кӱлын. Ме команде дене баскетболышто вий-куатнам ончыктенна. Чумыр иктешлымаш почеш 41-ше верыш лектынна. Тидат тӱҥалтышлан сай результат. Кугу олаште лияш, йот кундемласе спортсмен-влакын опытыштым эскераш, нунын дене таҥасаш – моткоч кугу пиал. Тыгай йӧным мыланна тренер Виталий Леонидович Терёшин пуэн. Тудлан кугу таум ойлена, – палдарыш командын ик участникше, Ариана.
Тудо спорт дене кылым кудымшо ий куча. Ӱдыр 9-ше классыште тунемеш, садлан яра жапым тунеммашлан ойыра. Вет ончылно – экзамен.
Оля МАЙКОВА.
Фотом еш архив гыч налме.
