Кушкыл-влакым арален кодымаште, шочмо кундемнам арун кучымаште кугыеҥ-влак гына огыл, школышто тунемше-влакат тыршат. Марий Турек посёлкысо школышто «Берендей» школ лесничестве тидын шотышто кугу пашам шукта. «Эн сай школ лесничестве» российысе школ лесничестве-влакын заочный смотр-конкурсыштышт сеҥышыш лектын.
Лесничествын пашаже нерген биологийым туныктышо И.Г.ПОРФИРЬЕВА каласкала:
– Тиде конкурсышко кокымшо гана ушненна. Ӱмаште республикыште икымше лийынна гын, тений – Российыште. «Берендей» школ лесничествым 2005 ий 4 февральыште почынна. Ондак тудо экологий отряд лийын. Тачысе кечын тудо 5-8 классласе 25 тунемшым авалтен. Берендей «чодыра кугыжа» манме лиеш.
Акций-влак: «Чодырам аралена», «Изи кожлан чодыраште сай», «Телым кайыкым пукшо!», «Йошкар герань», «Макулатур» да молат.
