У ий вашеш еҥ-влак миллион дене кожым руат. Кок-кум арня пӧртыштє шогыктымеке, кӱлдымӧ арвер семын луктын кудалтат. А вет тудын кушкын шумешкыже, ятыр жап эрта. Шындыме деч вара ик ийыште 3-4 сантиметрлан кушкеш. Вара – 10-20 сантиметрлан. Тугеже ик метрат пеле кугытан лияш, кожлан 10 ий наре кӱлеш. Ынде шоналтыза, кажне ийын кожым руымо дене мыняр пӱртӱс поянлыкым йомдарена? Мыняр эҥгекым ыштена? Кызыт кевытыште шуко тӱрлӧ искусственный кожым ужалат. Иман пушеҥге ӱпшым пурташлан кож укшым вӱдыш шындаш лиеш. Пӧрт ончылныда пушеҥге уло гын, моторын сӧрастарен кертыда.
