Май мучаште 1-ше номеран Морко школышто тӱҥалтыш класслаште тунемше-влак тунемме идалыкым иктешленна. Икымше туныктышо, тӱҥалтыш школ дене чеверласенна (снимкыште). Пайрем ик велым куанле лийын: вучымо кеҥеж каныш тӱҥалын, а вес могырым шӱлыкан – икымше туныктышо деч ойырлыман. Школышко мемнан ача-аванашамыч толыныт. Нуно туныктышылан таумутым ойленыт. Кугыеҥ-влак мыланна школ илышын вес йыжыҥыштыже сеҥымашым тыланеныт. Ме нуным чапле концерт дене куандаренна. Чолга тунемше-шамычлан дипломым кучыктеныт.
Тӱҥ ужаш деч вара ача-ава-влак да класс вуйлатыше дене пырля каныме верыште лийынна. Тушто аниматор-шамыч тӱрлӧ конкурсым, шовын шӱвыроҥ шоум эртареныт. Мемнан деке Горилла унала толын да пырля модын. Пеш весела лийын. Пайрем кужу жаплан шарнымашеш кодын.
Софья НИКИТИНА.
Фотом школ архив гыч налме.
