Чодыран поянлыкшым шымлен

Советский район Роҥго школышто «Дети в науке» акций эртаралтын. Ӱдыр-рвезе-влак марий пӱртӱсын поянлыкшым, марий ойӧрӧм, марий йомакым шымленыт, проектым возеныт да араленыт. 11-ше классын тунемшыже Даша ЯМБУЛАТОВА  «Марий чодырасе пушеҥге-влак» шымлымаш пашам эртарен. Тыгай темым ойыраш «Лосёнок» школ лесничествыш кудымшо ий коштмыжо таратен.

– Марий Эл Республикын пеле утла кумдыкшым чодыра авалтен. Килемар,  Звенигово районла чодыралан поян улыт. Шымлымаш пашам эртарыме годым ятыр уверым книгагудышто кычалынам,  Интернетысе сайт-влакым шергалынам. Мыланем туныктышем Ольга Георгиевна Егорова полшен. Тыгай иктешлымашке шуынам: Марий Элысе чодыраште утларакше куэ,  пӱнчӧ, кож вашлиялтыт. Шӧрва, шем тополь шагал кушкыт. Ме чодырам аралышаш да пушеҥгым шындышаш улына, – ойла ӱдыр.

Дашалан шанче паша – шкешотан тӱня. Чолга ӱдырын ушыштыжо ятыр проект пӧрдеш. Тугеже сеҥымашым тыланена!