Удмурт йоча-влак пиалан улыт. Нунылан да самырык-шамычлан «Ӟечбур!» (Салам лийже!) газет лектеш. Тӱрлӧ статья деч посна тушто ӱдыр-рвезе-влакын пашаштат савыкталтеш. Ик эн чолга юнкор – Удмурт Республикысе Завьяловский район Пычановский школышто 5-ше классыште тунемше Артём Мензарипов (снимкыште). Моло йолташыже-влак одо йылме дене огыт кутыро гынат, рвезе мутланаш ок вожыл – мӧҥгешла, кугешна. Шочмо йылмыжым вияҥдаш манын, «Ӟечбур!» газетышке тӱрлӧ оҥай ситуацийышке логалмыж нерген ойлымашым воза. Чолган серкален шогымыжлан, артист койышан улмыжлан Артёмлан газетын лӱмгече пайремжым вӱдаш ӱшаненыт. Тудо тушто Ӟечбуркан рольжым модын.
– Эргымлан одо калыкын тӱвыраже да йӱлаж нергенат пален налаш оҥай, садлан тӱрлӧ пайремышке, мероприятийышке чӱчкыдын пеленем налам. Удмуртийыште «Пичи Чеберайёс но Батыръёс» (Изи мотор ӱдыр да патыр-влак) регион-влак кокласе йоча конкурс, «Чыжывыжы-выжыкыл» (Родо-тукымемын йомакше) йоча фестиваль эртаралтыт. Пельмень, табань, перепечи калык кочкышлан шотлалтыт, садлан нунылан пӧлеклалтше пайремат уло. Ижевск олаште «Пельменьфест» фестиваль изижымат, кугужымат иквереш уша. «Табань Fest» фестивальыште табань кочкышлан кугу тӱткышым ойырат, – каласкала Артёмын аваже Екатерина Анатольевна.
Одо-влак поян тӱвырашт, Байгурезь пӱртӱс памятникышт, кугу курыкышт, кок тӱжем утла памашышт, поэт-шамыч Ашальчи Оки, Кузебай Герд да моло уста еҥ влак дене кугешнат. Артём Мензариповат тидын нерген изинек пала да, кугурак лиймекше, газетышке возаш шона.
Христина ТОКПУЛАТОВА
Фотом ешын архивше гыч налме.
