«Ямде лий» газет – йоча годсо поро йолташем. Школышто тунеммем годым тудын дене пеҥгыде кылым кученам. Почтальоным шуматкече еда шӱм-чон вургыж вученам. Газетым кидышке налын, яндар чия пушыжым шӱлалтен, лаштыклажым лышташленам. Тыгодым чонем пуйто каваште чоҥештылын.
Йоча газет мыланем, тунамсе тале юнкорлан, 1975 ийыште «Артек» пионер лагерьыш каяш путёвкым пӧлеклен. Кужэҥер район Йӱледӱр школым тунем пы-тарымеке, «Ямде лийын» тунамсе тӱҥ редакторжо Алеко Юзыкайн Марий кугыжаныш университетышке шинчымашым погаш пураш темлыме серышым кучыктен. Окса чӱдылан, чияш вургем укелан кӧра тиде шонымаш шукталтдеак кодын.
«Ямде лий» дене кылым кучышо, поэзийлан шӱмаҥше, тудын порсын лӱҥгалтышыштыже лӱҥгалтен ончышо кажне еҥын чонжо сылнымут тӱня дене ӱмырешлан кылдалтеш, очыни. Мый почеламутым кызытат возем.
Йӧратыме газетемлан кугу таум ойлем да пиалан ӱмыргорным тыланем. Лудшет шуко, возышо-влакын перашт пӱсӧ да писе лийышт.
Тиде почеламутым кызытат шарнем, авторжым веле ом пале.
Почтовый яшлыкыш письмам
Мый таче пыштенам.
Моткоч кугу куан мылам,
Вет мый юнкор улам!
Шергакан «Ямде лий» газет,
Тый вучо ӱшанен.
Тылат воза юнкор таҥет,
У стихым пӧлеклен!
А.ЩЕРБАКОВА (ШАБАЛИНА).
