Медведево район Руэм посёлкысо Шуко профилян лицей-интернатын тунемшыже-влак (снимкыште) «Территория успеха» всероссийский конкурсын полуфиналыштыже сеҥыше-влак радамыш лектыныт. Тений ты таҥасымашке Российын 50 регионжо гыч вич тӱжем утла тунемше ден туныктышо ушненыт. Финалыш 30 команде лектын. Нуно тӱрлӧ заданийым шуктеныт, проектым возеныт да пашаштым ончыкылыклан радамленыт. Ӱдыр-рвезе влак тунемме тӧнежыштышт лидер улмыштым ончыктеныт.
Шуко профилян лицей-интернатыште шинчымашым погышо йоча-шамычлан директорын воспитаний шотышто советникше Людмила Гусева кугу полышым пуэн.
Конкурсын финалже Москваште сентябрьыште лиеш. Российын тӱрлӧ кундемже гыч сеҥышыш лекше чолга тунемше, вуйлатыше, педагог-куратор-шамыч погынат.
Людмила ГРИГОРЬЕВА ямдылен.
Фотом лицей-интернатын архивше гыч налме.
