Татарстан Республик Актаныш район Йӱштӧ Памаш школын 8-ше классыштыже шинчымашым погышо Аннетта Галиевалан йылме-влакым тунемаш келша. Тиде тунемме идалыкыште марий, руш, татар йылмыла дене районысо олимпиадылаште сеҥыше-влак радамыш лектын. Марий йылме да литератур дене республикысе олимпиадыштат ойыртемалтын.
– Школна «Этнопарк» проект почеш пашам ышта. Тудо тӱрлӧ кружок ден секцийым уша. Мутлан, мый «Ший памаш» калык ансамбльыште мурен-куштем. Волейбол дене модам. «Телевидений» кружокыш коштам. Школ илыш дене палдараш манын, ме материалым ямдылена да эфирыш луктына. Краеведений дене кылым кучем. Школ тоштерлан уверым погена. Чолгалык сеҥымашым конда, – ойла Аннетта.
Чолгалык сеҥымашым конда
