Йоча-влак ветеринар врачым Корней Чуковскийын «Доктор Айболит» йомакше гоч палат. Тудын поро пашаже ӱдыр-рвезе-влакым ныл йолан йолташым йӧраташ туныкта. Йошкар-Оласе «Артемида Плюс» ветеринар клиникыште тыршыше Е.А.БАТРАКОВА тыгаяк сомылым шукта.
– Екатерина Александровна, ветеринар врач профессийым ойырен налаш мо таратен?
– Пийым, пырысым изи годсек йӧратем. Нуным шке гыч эмленам, уремыште йомын коштшым ужынам гын, пукшенам, полышым пуаш вашкенам. Йоча годымак ветеринар лияш шонымашем шукталтын. Ынде лу ий йӧратыме пашам ыштем.
– Ныл йолан йолташ-влак кокла гыч мом пӧртыштӧ ашнаш келша?
– Пий, пырыс шукертак айдемын йолташышкыже савырненыт. Но пийым налме деч ончыч пӧрт кумдыкым шотыш налман, тудлан мыняр жапым ойырен кертме нерген шоналтыман. Мутлан, оласе ик пӧлеман пачерыш овчаркым налын шогалтен, эҥгекым веле ыштет. Пийын йыжыҥже-влак коршташ тӱҥалыт. Яндар южыш от лук гын, пӧртысӧ арверым, шке почшым пураш тӱҥалеш. Пырыс удыркалаш йӧрата. Ашнаш шонышо еҥ тидым шотыш налшаш. Колым, кайыкым, куголям ончаш куштылгырак. Енотым, рывыжым, шурмаҥшым ида кучо. Нуно чодырасе янлык улыт.
– Пийым озажым колышташ кузе туныкташ?
– Пийым туныкташ ятыр жап кая, чытыш кӱлеш. Шарныман, кажне урлыкын – шке койыш-шоктышыжо. Пий эн ончыч озажын йӧратымыжым шижшаш. Моктымо, вурсымо, командым пуымо йӱкым тудо изинек ойыркалышаш. Ик командымак икмыняр гана пуаш сай огыл, шуко гана икгай шомакым колын, колыштмым чарна. Ушан да мут колыштшо йолташым ме шке куштена. Калыкыште ойлат: «Мом ме туныктена, тудын верч мутым кучена».
