Башкортостан Республикысе Уфа олаште илыше Хазиевмыт ешым мӱкш гай пашаче манам гын, йоҥылыш ом лий. Нуно кугу олаште илат. Ача-ава икшывышт дене каныш кечылан шочмо верышкышт, Мишкан район Кугу Соказа ялыш, вашкат. Коча-ковалан мӱкшым ончаш полшат. Озавате Виктория Вениаминовна – амалкалче. Тудо мӱйым ужала.
Чон шочмо верыш ӱжеш
– Йолгорно кеч-кушко наҥгая гынат, чон эре шочмо верыш шупшеш, – ойла Виктория Вениаминовна. – Санкт-Петербург олаште кок ий илымеке, башкир мландын сӧрал пӱртӱсшым нимо дене таҥастараш огеш лий манын, раш умыленам. Кугу ола шке семынже сымыстарен гынат, марий вӱрем шке кундемыш ӱжын.
Виктория ден Рамиль Хазиевмытым пӱрымаш мӧҥгеш шочмо верыш конден. Кызыт ача-авашт деч тораште огыл шкаланышт пӧртым чоҥат. Рамиль Вилевич пашалан чулым. Йӧратыме ешыжым у пӧртыш писынрак илаш пурташ манын, йӱдшӧ -кечыже тырша. Виктория пелашыже – тудын пурла кидше. Суртышто лекше чыла сомылым ик ойыш шуын ыштат. Кок икшывым, Камила ден Арианам, ончен куштат.
Кок ӱдыр – кок пеледыш
Кугурак ӱдырышт – Камила. Уфа оласе 38-ше номеран школын кудымшо классышкыже вончен. Тудо аван эн кугу полышкалышыже. Кочкаш шолта, пӧткӧргым эрыкта. Виктория Вениаминовналан мӱйым ужалаш полша. Камила марий улмыж дене кугешна. Школышто марла эртаралтше мероприятийлаш марий вургем дене коштеш. Марла мураш, почеламутым лудаш йӧрата. Яра жапыштыже тамлын ӱпшышӧ шовыным ышта. Икте кампеткыла коеш, весе – кугымӧрла. Тӱрлӧ тӱсан пеледышыже чылт илыше гай.
Ариана икымше классыш каяш ямдылалтеш. Сумкашке тетрадьым, ручкам да моло арверым шукертак оптен ямдылен. Акаж гаяк чолга, марий шӱлышан кушкеш. Изи ӱдыр моторын сӱретла. Сӱретше-влак йочасадысе, мӧҥгысӧ пырдыжлам сӧрастарат. Районысо конкурслаште чапкагаз дене ятыр гана палемдалтын. Ю.А.Гагарин лӱмеш кубок верч республикысе олимпиадыште сеҥымыжлан отличий значокым кучыктеныт.
Й ӱлам пагалат
Камила ден Арианалан ковашт марий тувырым шукертак урген да тӱрлен пуэн. Самырык вате-марий икшывыштым марий ден татар калык-влакын тӱвырашт дене изинек палымым ыштат. Сабантуйлан татар ялыш каят гын, Кугече, Семык пайремлан – марий ялыш. Пайрем чесым ямдылыме, сортам чӱктымӧ годым йоча-влак пеленышт лийышт манын тыршат. Кугурак-шамычын пелештымыштым колын, йӱлам шуктымыштым ужын, вес гана шкештат тыгак ышташ тӱҥ алыт, шонат.
– Башкортостан кундемысе вершӧр сылне. Ме еш дене тӱрлӧ вере коштына, шочмо кундемым йӧраташ туныктена. Камила ден Ариана марий улмышт дене эре кугешнаш тӱҥалыт манын ӱшанена, – ойлат самырык вате-марий.
