Пошкырт кундем Бирск район Курмызак ялыште марий шӱлышан, пайрем йӱлам жаплыше Байрамовмыт еш (снимкыште) ила. Роберт Русаевич ден Лиана Ярминкиновнан ушнымыштлан тений – 31 ий. Суртоза – Кужнур ял шотан илемын вуйлатышыже. Озаватын илышыже марий тӱвыра дене кылдалтын. Тудо ятыр ий клуб пеленысе «Шонанпыл» йоча ансамбльым вуйлатен. Вате-марий куд икшывым ончен куштат.
Кугурак эрге-шамыч Рудольф ден Антон ешым чумыреныт. Коктынат кок икшыван улыт. Самырык ача-влак шкешт гаяк марий шӱлышан йочам куштат.
Мария Бирскысе кугыжаныш педагогике институтым тунем пытарен. Кызыт кевытыште пашам ышта. Руслан шукерте огыл армий гыч толын, йӱдвелне тырша. Виктория эмлызе лияш ямдылалтеш. Бирскысе медико-фармацевтический колледжын кокымшо курсыштыжо шинчымашым по-га. Спорт дене пеҥгыде кылым куча. Ятыр медальже, чапкагазше уло.
Эн изиже – Вероника. Тудо ача-аван куанышт, полышкалышышт. Аваж гай чолга, усталык шӱлышан, ачаж гай ушан да чулым кушкеш. Курмызак школын 2-шо классыштыже тунемеш.
– Шочмо йылме тукым-влак коклаште кылым пеҥгыдемда. Шочшына-влак марий койышан улыт. Ешыште марла кутырен, йылмым йӧраташ туныктенна, – ойла Лиана Ярминкиновна. – Ешыште пайрем йӱлам шуктена. Икшывына-влак тидын нерген изинек пален кушкыныт. «Шонанпыл» ан- самбльыште муро, куштымаш гоч калыкын эртыме корныжым почын пуаш тыршенам. Эргына-влак кызыт шке ешыштышт марий пайремым пайремлат. ™ярнялан, Семыклан уналыкеш толыт. Чесым ямдылен, ӱстел йыр погынен, чон почын кутырен шинчымынам еш йӱлалан шотлем.
Шочмо суртыш кеч-кунамат чон шупшеш. Арам огыл тудым чоным ырыктыше вер маныт.
