5 апрельыште Йошкар-Оласе Йоча ден самырык-влакын усталык полатыштышт «Живая классика» всероссийский конкурсын регионысо этапше эртаралтын. Таҥасымашке республикысе тӱрлӧ школ гыч 51 йоча ушнен. Ӱдыр-рвезе-шамыч прозо гыч ужашым рушла да марла лудыныт. Руш сылнымутым каласкалыше кум сеҥыше – Юлия Скулкина (Йошкар-Ола, «Синяя птица» гимназий), Сергей Петров (Марий Турек школ), Ариана Хорикова (Йошкар-Ола, 11-ше номеран лицей) – Марий Элын чапшым «Артек» тӱнямбал йоча рӱдерыште аралаш тӱҥалеш.
Конкурсышто индеш ӱдыр марий сылнымутым лудмо дене мастарлыкым ончыктен.
– Тыгай таҥасымаште ӱмаштат усталыкем тергенам. Сеҥыше-влак радамыш лектынам. Мыланем сылнымутым марла лудаш утларак келша, – ойла 1-ше номеран Шернур школышто тунемше да теният ончыко лекше Анна Прохорова. Тудо Вениамин Ивановын «Тӱтан» романже гыч ужашым лудын. Марий йылмым туныктышо Надежда Николаевна Якимова ямдылен. Марий секцийыште тыгак Доминика Матвеева (Марий Турек школ) ден Анна Денисова (Курык-марий, Эмӓн) ойыртемалтыныт. Нуным снимкыште ужыда.
– «Живая классика» конкурсышто лудшо-влакым ятыр гана аклаш логалын. Йоча-влак уста улыт. Сценыште шкеныштым кучен моштат. Тыште туныктышыштын тыршымышт коеш. Но конкурс деч ончыч туныктышо-шамычлан сылнын лудмо, могай произведенийым ойырымо шотышто семинарым эртараш гын, сай ыле. Йоча-влак южгунам йӱкышт дене модыт, кидыштым утыждене лупшкедылыт. Тиде вет тӱҥ огыл, –тыгай ой-каҥашым темла жюрин еҥже, Марий Элын сулло артисткыже Марина Почтенева.
Оля МОШКИНА.
Авторын фотожо.
