Советский район Ӱшнӱр школын 11-ше классшым тунем пытарыше Татьяна Дмитриева марий йӱлам шымлаш кумылан. Пытартыш шымлыме пашаже «Чон куаным тыге шочыктем…» маналтеш. Вуйлатыше – марий йылмым да литературым туныктышо З.А.Волкова.
– Кажне еҥ элжын патриотшо лийшаш. Шочмо калыкын йӱлажым палыде, ончыко каяш огеш лий. Ме шочмо кундемнан мастар еҥже-влак нерген палышаш да нунын ус-талыкыштым шымлышаш улына. Марий тӱвыран поянлыкше тукым гыч тукымыш куснен толеш. Мемнан пашана – аралаш, – ойла Таня.
Марий ӱдырын шымлыме пашаже Ӱшнӱр ял гыч уста кидмастар, тӱрлызӧ, марий йӱлам жаплыше, «Весела кумыл» ансамбльын участникше Г.Н.Волковалан пӧлеклалтын. Галина Николаевна марий тувырым тӱрла, курчак-влакым сӧрастара. Пашаже-влакым тӱрлӧ ончерыште, конкурсышто ужаш лиеш. Кидмастарым эсогыл «Поедем, поедим!» телепрограммыште ончыктеныт.
– Галина Николаевна дене моткоч кугешнем. Тудын гаяк чолга, марий шӱлышан, шочмо калык верч йӱлышӧ лияш тыршаш тӱҥалам, – ойла марий ӱдыр.
