16-22 июльышто Оренбург областьыште «Зарница 2.0» всероссийский сарзе-патриотизм модмаш эртаралтын. Тушко Юл кундем федерал округын 14 регионжо гыч 280 наре ӱдыр-рвезе ушнен. Марий Эл гыч Шуко профилян Оршанке колледжын студентше-влак да Морко район Нурӱмбал школын «Отчина» командыже (снимкыште) миен коштыныт.
Школышто тунемше-шамыч сай лектышым ончыктеныт. Серафима Тимофеева ден Камиль Галимов медицине дене кылдалтше таҥасыште икымше верым сеҥен налыныт. Отрядын командирже-влак коклаште Ильназ Фалзянов кумшо лийын. «Отчина» отряд «Север» армийын составше дене пырля таҥасен да финалысе бойышто сеҥен.
– Мылам модмаш моткоч келшен. Конкурс-влак неле лийыныт. Моштымына, чулымлыкна, ятыр жап ямдылалтмына сеҥымашке шуаш полшеныт. Пеш йывыртенна, – ойла Серафима Тимофеева.
Оля МАЙКОВА.
Фотом школ архив гыч налме.
