30 октябрьыште Республикысе йоча да самырык-влаклан В.Колумб лӱмеш книгагудышто Василий Элмарын сылнымутшо гыч ты почеламут корно ятыр гана йоҥген. Марий Элын тӱрлӧ районжо ден олаж гыч 185 ӱдыр-рвезе шочмо вершӧрлан пӧлеклалтше марла да рушла возымо почеламутлам сылнын лудын. Йоча-шамычын ийготыштым шотыш налын, кум секций пашам ыштен.
Эн изи участник-влак коклаште марий почеламутым раш каласкалымыж дене Йошкар-Оласе 76-шо номеран йочасадыш коштшо Ксения Лапухина икымше верым сеҥен налын. Тӱҥалтыш класслаште тунемше-шамыч коклаште пӱсӧ таҥасымаш лийын. 1-2-шо классла коклаште Анна Коробина (Йошкар-Ола, 32-шо номеран школ), а 3-4-ше классла коклаште Дарина Галкина (Йошкар-Ола, 7-ше номеран школ) эн сай лудшо семын палемдалтыныт. Морко район Эҥерсола школышто тунемше Мария Николаева 5-9-ше классла коклаште сеҥышыш лектын. Кугурак класслаште тунемше-шамычым студент-влак дене пырля акленыт. Икымше верым Йошкар-Оласе Технологический колледжын студенткыже Полина Онучина сулен налын. Каласен кодыман: 25 участник коклаште лач кок школьник лийын. Иктыже – Звенигово лицейыште 10-шо классыште тунемше Мария Яковлева (снимкыште). Тудо Илья Караевын «Ты мланде» почеламутшо дене кокымшо верыш лектын.
– Шӱм-чонлан келшыше почеламутым иканаште ойыраш куштылгыжак огыл ыле. Конкурсыш ушнымемлан моткоч йывыртенам, а сеҥыше-влакым саламлымаште лӱмемым колмеке, кумылем эшеат нӧлталтын. Сеҥымаш ончыкыжымат вийым тергаш кумылаҥда, – ойла Мария.
Катя СЕРГЕЕВА.
Авторын фотожо.
