Киров кундем Кӱльмӱж район Нурдуваш ялысе книгагудо пашаеҥ Н.П.Гужавина марий йылмым да тӱвырам арален кодымаште кугу пашам шукта. Марий йылме да тӱвыра арням ий еда эртара. Пайремышке йоча-влакым уша.
– Марий йылме да тӱвыра арнян кажне кечыже оҥайын да пайдалын эртен. Йоча-влак вынерым куымаш дене палыме лийыныт. Марий тӱрын мом ончыктымыжым шымленыт. Подкогыльым тӱрлаш тунемыныт. Кова-влак кидпаша нерген каласкаленыт. Марий мурым йоҥгалтареныт да йоча-шамычым мураш кумылаҥденыт. Пытартыш кечын ӱдыр-рвезе-влакым Салика кокай ден Айвика ӱдыржӧ вашлийыныт. «Йыдалым пӧрдыктен», «Кол кучен» модыш-влак дене модыктеныт. Йоча-шамыч по-челамутым марла каласкаленыт, «Ола чыве» сценкым ончыктеныт, – ойла Нина Петровна.
Икшыве-влак школышто марий йылмым факультатив семын веле тунемыт. Книгагудышто эртарыме марий мероприятий-влак йоча-шамычым марий улмышт дене кугешнаш таратат.
