«Йочам сылнымут деке эр шӱмаҥдет гын, лектыш куандарыше лиеш», – манеш Морко район Арын кыдалаш школышто тӱҥалтыш класслам туныктышо Олимпиада Алексеевна Васильева. Тудо ӱдыр-рвезе-влакым икымше класс гычак тӱрлӧ конкурслан ямдыла. Ик чолга тунемшыже – Максим Семёнов. Изи гынат, уста рвезе. Калык ончылно почеламутым лӱдде, вожылде каласкалаш ок аптыране.
Шочмо йылмым пагалымашын, йӧратымашын негызше – ешыште. Максимын коваже Елена Викторовна почеламутым воза, книгамат савыктен луктын. Аваже Наталья Вениаминовна тӱҥалтыш класслам туныкта. Олимпиада Алексеевна марий шӱлышан ешыште шочын-кушшо икшывын шинчымашыжым пойдараш, чын корно дене виктарен колташ полша.
Рвезе йӧратыме туныктышыжын вӱдымӧ «Сескем» сылнымут кружокыш коштеш. Тушто йолташыже-влак дене пырля йомакым лудыт да лирический герой-влакын койыш-шоктышыштым лончылат, туштым туштат, калык пале ден калыкмутлан тӱткышым ойырат. Арня еда «Ямде лийым» шергалыт да заметкым возаш тунемыт. Кажне йочан ача-аваже икшывыштлан подпискым ыштеныт.
Олимпиада Алексеевналан выпускникше-влакат тауштат. 5-ше классыште тунемше Артём Сергеев мастарлыкшым ятыр сылнымут конкурсышто терга. Рвезе дене Морко посёлкысо М.Н.Янтемир лӱмеш тоштерыште эртаралтше «Казаков лудмаште» вашлийын мутланышна.
– Икымше класс гычак конкурслаш ушнем. Ятыр вере миен коштмем чолга лияш да сценыште шкем ӱшанлын кучаш туныктен. Кызыт кажне гана сеҥыше-влак радамыш лектам. Лач ик гана вер деч посна кодынам. Тидыже эше чот тыршаш кумылаҥден, – ойла Артём. – Марий Элыште илена, садлан йылмым палышаш улына. Ме шочмо йылмым да литературым тыршен тунемына. Ешыште, йолташ-влак коклаште марла мутланена.
Оля МАЙКОВА.
Авторын фотожо-влак.
