Чывытан деч ида лӱд!

Пырля тунемше йолташемлан авам дене вӱд воктеке коштмына да чывытаным эскерымына нерген каласкалышым. «Чывытаным? – ӧрын йодо йолташем. – Кузе тудым кучаш лӱдын отыл? Пурлын кертеш вет!» Вӱдысӧ тиде шукшым шукын тушманлан шотлат. «Чывытан деч лӱдман огыл. Тудо айдемылан да йырым-йырысе пӱртӱслан пайдам конда», – умылтарыш авам.

Ерыште чывытаным ужмеке, мом ыштыман? Тиде йодышлан вашмутым муаш манын, авам дене шымлымашым эртарышна. Марий кундемыште латик тӱрлӧ чывытан ила. Шукш-влак шем, ужар але кӱреналге тӱсан, 10 сантиметр наре кужытан лийыт. Ме изи да кугу ложноконский чывытан-влакым чӱчкыдынрак вашлийна. Нунын оҥылашлушт айдемын коваштыжым пурлаш келыштаралтын огыл. Коваштышке пижын,  капыште ырат.

Айдемын вӱржым медицинский ден черепаший чывытан-влак йӱыт. Нуно шуэн вашлиялтыт.

Чывытан коваштышке пижеш гын,  мамыкым бензин, спирт але йод дене  нӧртыман да шукш дек лишемдыман. Пурлмо вер гыч кӱч дене эркын кораҥдыман.

Чывытаным медициныште кучылтыт. Нуно айдемым тӱрлӧ чер деч эмлат. Шукшлан ида сыре, тудын деч ида лӱд!

Давид ТИМОФЕЕВ.

Волжск, 2-шо номеран  школ.