Кызыт йоча-влакым книгам лудаш кузе шӱмаҥдаш? Медведево районысо Руэм школышто тӱҥалтыш класслам туныктышо Л.Г.Иванова икшыве-влаклан конкурсым эртарен. Пашашке Руэм селасе книгагудым ушен. «По секрету всему свету, что читаю, расскажу» конкурсышко районысо тӱрлӧ школышто тӱҥалтыш класслаште тунемше-влак деч ятыр паша пурен. Йоча-влак тунемме идалык мучко лудмо книгала почеш дневникым вӱденыт. Тушан шке шонымашыштым возеныт, сӱретым келыштареныт але вес йӧн дене дневникыштым сӧрастареныт.
– Таҥасымашке Медведево гимназий, 2-шо номеран Медведево да Руэм школла гыч эн шуко паша пурен, – ойла Лариса Геннадьевна. – Кажне дневник шкешотан да икте-весе деч ойыртемалтше лийын. Паша-влакым чумырен, Руэм селасе книгагудышто ончерым келыштарыме.
1-ше вер дене палемдалтыныт:
Есения Ларионова (Шойбулак, туныктышо О.А.Фёдорова);
Амалия Рябинина (Азаново, туныктышо Н.П.Мочалова);
Екатерина Иванова (снимкыште) (Турша, туныктышо Л.В.Иванова).
