Шочмо
Мый спортым йӧратем. Образований министр лиям ыле гын, физкультурым тӱҥ предмет радамыш пуртымо шотышто пунчалым вигак луктам ыле. Мом ойлаш, тачысе кечымат мый куржталмаш гыч тӱҥальым. Мален кодмемлан кӧра школыш мардеж деч писынрак чошаш логале.
Кушкыжмо
Урок деч вара ушкал кӱтӱм вашлияш кайышым, но йоча-влак модмашке ушнышым. Вот азап! Ушкал йомын! Зорюкым Михаил Ивановичын пакчаштыже верештым: ковыштам кочкеш ыле… Эрла школ директор шкеж деке ӱжеш гын, Зорюк дене пырля каяш ала-мо…
Вӱргече
Биологий урокышто колвлакым тунемна. Могай гына кол уке улмаш! Таисия Борисовна «Кол Антарктиде воктенат илен кертеш» мане. Молан вара мемнан изи купышто ужава-влак веле тӧрштылыт?
Изарня
Марий литератур урокышто «Йолагай ден Пулагай» почеламутым лудна. Нунын каҥашыштым илышыште терген ончаш шонышым. Олмапу йымаке возым да ятыр жап кийышым. Могай олма! Кылмен да нӧрен пытышым. Тиде тат гыч Йолагай ден Пулагайын каҥашыштым нигунам ом колышт!
Кугарня
Таче кочмыверыште дежурный лийна. Каструль-влакше могай кугу улыт! Тушко мыят шыҥем докан. А кочкаш шолташ мыняр пареҥгым, кешырым, ушменым эрыктыман! Вес ийын школ пакчаште пашам чот ышташ логалеш.
Шуматкече
Кечывал деч вара кол кучаш кайышым. Иктымат кучен шым керт! Кол-влак ну чот чоя улыт!
Эҥыремым почышт дене лӱмын тарватат, йылым йылт кочкын пытарат. Эше, игылтын, вӱд йымач тӧрштен лектыт, пуйто шинчашкем ончен воштылыт…
Рушарня
Таче футболла модмаште сеҥышыш лекна. Сеҥалтше команде моткоч шӱлыкаҥын. Рвезе-влак коклаште шинчыше Васлий саҥга йымач мече ӱмбак ятыр жап ончен шинчыш. Кенета «Шӧрын мече!» манын кычкыралын, уло вийже дене чумал колтыш. Мече ялысе тӱвыра пӧрт окнашке чоҥештен пурыш. Янда пудыргымо йӱк уло уремлан шергылте. Мечыжак шӧрын мо вара?
