Туныктышо да йолташем-влак дене пырля ял шеҥгек пӱртньыкым погаш мийышна (снимкыште). Туныктышына тиде кушкыл нерген шуко каласкалыш. Пӱртньык – эмлыше кушкыл. Лышташыж дене чайым шолтат. Ятыр эмым, мазьым ышташ пӱртньыкын эфир ӱйжым кучылтыт. Мӱкш-влак тиде кушкыл деч нектарым погат. Пӱртньыкым кампеткыш, мӱгиндыш, лумэгерчыш, коктейльыш да шуко тӱрлӧ кочкышыш ешарат. Пӱй мушмо пастат пӱртньык таман уло. Косметологийыштат кучылтыт. Пудий, шыҥа, копшаҥге-влак деч аралалташ пӱртньык ӱй полша. Пӱртньык пуш деч сокырголя-влакат лӱдыт, садлан тиде кушкылым пакчаш шындаш темлат.
Погымо пӱртньыкнам коштена да теле мучко тамле чайым йӱына. Тыге чер деч аралалтына. Тыландат тыгак ышташ темлена.
Иделия ИШМУРЗИНА.
Татарстан, Агрыз, Буймо.
