«Кугарня» газетын пашаеҥже, самырык поэтессе Надежда Моисеевам Эмыкан семын утларак палат.
– Шоялӱмым налаш шонымаш кунам да кузе шочын?
– Марий кугыжаныш университетыште тунемме годым «Поэзий шепкаште» кружокыш коштынам. Тудым марий поэтессе Зоя Михайловна Дудина вӱден. Тудо самырык-влакын возымо почеламутлаштым книгаш чумырен. Ты книгам эстон писатель, сценарист Арво Валтон лукташ полшен. Тудо мыланна, самырык возышо-влаклан, псевдонимым налаш темлен.
Мый шуко шонен омыл. Эмыкан лӱм ушышкем иканаште пурен. Мемнан тукымна Эмыкан гыч тӱҥалын. Тиде моткоч ожно, Пугачёв восстаний годым, лийын. Эмыкан лӱман руш офицер руш войска гыч чодыраш шылын куржын. Марий ӱдырым марлан налын, марий йӱлам кучен илаш тӱҥалын. Эмыкан тукым нерген моткоч кугу шымлымаш паша эртаралтын. В.Березин тукымвожым шымлен да «Эмыкан тукым» книгам савыктен луктын. Тушко мыйын лӱмемат пуртен. Тукымна ынже йом манын, тыгай псевдонимым налынам.
