Марий Элыште «Идалыкын ешыже» республикысе конкурсым иктешленыт. Тудо еш йӱлам жаплаш таратыме, ешым да йоча пагытым аралыме шонымаш дене эртаралтеш. Тушко районла, округла да олала гыч ойыртемалтше 21 еш ушнен. «Шуко шочшан еш» таҥасыште Медведево район гыч Зуевмыт сеҥышыш лектыныт. Волжск ола гыч Михайловмыт «Самырык еш» номинацийыште ойыртемалтыныт. «Ялысе еш» таҥасыште Параньга район гыч Тупицынмыт чыланыштым ончылтеныт. «Шӧртньӧ еш» семын Марий Турек район гыч Насыровмытым палемденыт. «Элым аралышын ешыже» таҥасыште Звенигово район гыч Карсаковмыт ойыртемалтыныт. Йошкар-Ола гыч Завойскинмыт (снимкыште) «Йӱлам аралыше еш» таҥасыште сеҥышыш лектыныт.
Ойыртемалтше еш-влакым 8 июльышто Еш, йӧратымаш да ӱшанле улмо кечын саламлаш тӱҥалыт.
Христина ТОКПУЛАТОВА ямдылен.
Фотом еш архив гыч налме.
